Tendo en conta que un dos pilares da actividade económica da cidade é o turismo e a cultura, o que nos últimos anos provocou un incremento cuantitativo e cualitativo da actividade hostaleira, de restauración e comercial, como sucedeu no ano 2010 con motivo da celebración do Xacobeo, por iso, cabe destaca-la repercusión que elo ten na creación de emprego.
O TURISMO
Santiago de Compostela conta cun sector turístico en expansión e con importantes posibilidades cara o futuro, dado que na actualidade consolídase como a cuarta cidade española en relación á súa oferta cultural e a terceira en seguridade.
Co obxectivo de conseguir atraer turistas e seguir incrementando a repercusión que esta actividade ten na creación de novos empregos, estase desenrolando unha política turística que prima a calidade para conseguir incrementa-la estancia dos visitantes. Esta finalidade concrétase no Plan de Calidades de Destinos Turísticos impulsado polo Instituto de Calidade e Destinos Turísticos.
Como consecuencia desa política viuse incrementada a oferta hoteleira dun xeito moi importante en Santiago, xa que se pasou dos dezaoito hoteis en 1998 a cincuenta e tres en 2008, duplicándose tamén o número de prazas coas que se conta (de 2.278 a 4.894). Situación semellante é a que experimentan os hostais e pensións (que pasan de 49 e 1.703 prazas en 1998 a 94 e 2.146 prazas en 2008) e o turismo rural (cun auxe de 2 a 6 estabelecementos e de 27 a 72 prazas).
A situación contraria ten lugar nos cámpings, que reduciron á metade a súa presenza en Santiago ata os dous existentes en 2008 con 1.646 prazas dispoñíbeis.
Aumentou tamén, aínda que dun xeito non tan importante, o número de restaurantes, sobre todo de un e dous garfos. En 1998 había en Santiago 328 restaurantes que contaban con 18.278 prazas e en 2008 pasaran a ser 357 con 22.459 prazas.
Todo isto trouxo consigo un importante aumento de creación de emprego neste sector.
O COMERCIO
Co trascorrer do tempo, o comercio de Compostela sufriu unha transformación profunda xerando unha nova dinámica que supuxo a diminución do comercio tradicional.
No 2003 existían en Santiago 1816 establecementos comerciais de productos non alimentarios, 865 de productos alimentarios, 162 de comercios mixto, 536 de vestido e calzado 415 de fogar.
Actualmente a maior parte dos comerciantes agrúpanse en asociacións como o Centro Comercial Aberto Compostela Monumental, ó redor do cal se atopan o 25% dos establecementos da zona histórica da cidade. Recentemente, a capacidade organizativa dos comerciantes levou á creación doutra asociación sita no Ensanche e coñecida como Santiago Centro. Cabe destacar tamén, a Agrupación de Comerciantes de Santiago (Acotes). Esta última está formada por máis de 350 asociados na que están representados a totalidade dos segmentos do comercio da cidade, excluíndo a alimentación e a hostalería.